Nydyrking
Nydyrking av areal til jordbruksføremål krev løyve frå kommunen.
Nydyrking er opparbeiding av udyrka areal til fulldyrka eller overflatedyrka mark, og gjenoppdyrking av jordbruksareal som har lege unytta i over 30 år. Der fulldyrking er «rydde og bryte til vanleg pløyedjupn sånn at arealet kan nyttast til åkergrøde eller til eng og beite som kan fornyast ved pløying» og overflatedyrking er «rydde og glatte overflata sånn at maskinell hausting er mogleg», jf. §3 i Forskrift om nydyrking.
Definisjon og Reglement for Nydyrking
- Opparbeiding av overflatedyrka jord til fulldyrka jord blir ikkje rekna som nydyrking etter forskrifta.
- Innmarksbeite blir rekna som «udyrka areal» etter forskrifta. Opparbeiding av innmarksbeite til overflatedyrka eller fulldyrka jord blir altså rekna som nydyrking, og må behandlast etter forskrifta.
- Drenering, rydding og glatting av innmarksbeite blir rekna som nydyrking når maskinell hausting med totaktstraktor blir mogleg. Ut over dette vil opparbeiding av udyrka areal til innmarksbeite falla utanfor forskrifta sitt verkeområde. Rydding kan likevel vera omfatta av andre regelverk, her den generelle aktsamheitsplikta etter §6 i Naturmangfoldloven.
- Nydyrking av myr er ikkje tillaten, men kommunen kan i særlege høve gi dispensasjon til nydyrking av myr, jf. §5a i Forskrift om nydyrking.
Søknadsprosessen for Nydyrking
Meir informasjon og søknadsskjema til nydyrking kan finnast på nettstaden til Landbruksdirektoratet. Søknaden blir behandla av kommunen. Statsforvaltaren i Agder er klageinstans. Søknad om nydyrking blir send til kommunen:
Epost: post@aseral.kommune.no
Post: Åseral kommune, Gardsvegen 68, 4540 Åseral
Planering
Varige terrenginngrep krev løyve. Større inngrep skal behandlast etter plan- og bygningslova.
Definisjon og Reglement for Planering
Mindre tiltak som planering av jordbruksareal og bakkeplanering, for å gjera brattlendt eller kupert dyrkbart og tidlegare dyrka areal skikka for maskinell jordbruksdrift, er søknadspliktig etter §4-4 i forureiningsforskriften. Det er ikkje eige søknadsskjema for planering, men søkjar må senda inn ein forenkla søknad som skal innehalda kart som viser kva område som vil bli ramma av planeringa. Merk: Viktige natur/terrenginngrep, bekkelukkingar osv. skal merkast på kartet, jf. §4-4 andre leddet i forureiningsforskriften. Planen skal også vera «i samsvar med krava i «Tekniske rettleiingar for anlegg, drift og vedlikehald av planeringsfelt» fastsett av Landbruksdepartementet.», jf. §4-5 i forureiningsforskriften.
Søknadsprosessen for Planering
Søknaden blir behandla av kommunen. Søknad om planering blir send til kommunen:
Epost: post@aseral.kommune.no
Post: Åseral kommune, Gardsvegen 68, 4540 Åseral